Яңа китап: "По следам черной легенды"

Бездә милли хисләребезне баетучы китаплар бармы? “Спурт” банкының “Жилстройкредит” филиалы директоры, экономика фәннәре кандидаты Дәүләтшин Сәлим Хәбибрахман улы белән сөйләшкәч, әлеге сорауга җавап таптым кебек. Ул “Русия һәм Евразия тарихында татар эзе” дип аталган китаплар сериясе проекты авторы. Әлеге сериянең беренче китабы “По следам черной легенды” дип атала. Китап узган ел дүрт мең данә тираж белән басылган.

– Сәлим әфәнде, сез тарихчы түгел, экономика өлкәсендә эшлисез. Тарих китаплары сериясе чыгару фикере каян башыгызга килде?

– Мин Удмуртиядә туып үстем. Тарих дәреслекләреннән монгол татар явы турында укыганда анда татар халкын “кыргый”, “кара” халык дип күрсәтүләренә игътибар итеп, бик түбәнсенә идем. Кыргый халык булсак, шулкадәр илләрне яулый алмас идек һәм безнең телдә аның кадәр милләт сөйләшмәс иде…

КАИга укырга килгәч тә, шушы мәсьәлә бимазалап торды. Мин татар халкының тарихы белән кызыксына башладым һәм без мәктәптә укыган тарихның уйдырма икәнлегенә тәмам инандым. Мәскәүдә аспирантурада укыганда, дус-иптәшләр, фән кандидатлары белән аралашканнан соң, татарларның абруен кайтарырга сәләтле тарих китабы чыгару уе бөреләнде. Яшь чакта Алжас Сөләймановның “Азия” дигән китабы бу ниятемне тагын да ныгытты.

Уйланылганча барып чыкса, серия сигез китаптан торачак. Икенче китап язылып бетте инде. Язучы Гали Еникеев белән аңа исем уйлыйбыз әле.

– Китап тышлыгында Чыңгызхан сурәтеме?

– Бу символик сурәт. Чыңгызхан – ул безнең өчен герой. Китап Чыңгызхан, мәгърур, игелекле халкы турында. Алтын Урда, Русия дә булмас иде. Хәзер моны рәсми чыганаклар да таный. Чыңгызны күпме начар яктан күрсәтергә теләсәләр дә, ул бөек юлбашчы булган.Әлеге бөек хан турында былтыр дөнья буенча 14 фильм төшерелде. Димәк, бөтендөнья тарихында да аның эзе бар…

Татарстан яшьләре